Catherine Connolly (Galway West, Independent) | Oireachtas source

Ag dul ar ais, táim ag tacú leis an méid a bhí ráite ag an Teachta Ó Cuív.

Tá mé beagáinín amhrasach faoi thuilleadh taighde. Tá gá le taighde, ach tuilleadh taighde atá i gceist. Tá sé soiléir os comhair an choiste seo gach seachtain go bhfuil easpa Gaeilge agus easpa inniúlacht sa Ghaeilge ann. Táim ag smaoineamh ar an gcás le déanaí i gComhairle Cathrach na Gaillimhe. Tá mé fós ag baint úsáid as an bhfocal "bainisteoir" mar taitníonn an focal sin liom. Ní thaitníonn "príomhfheidhmeannach" liom ó thaobh seirbhísí áitiúla. Tá siad ann chun seirbhísí a sholáthar agus taitníonn an focal "bainisteoir" liom. Tá duine nua á lorg acu agus d’fhógair siad an post agus níor luaigh siad tada faoi Ghaeilge. Sin cathair dhátheangach agus tá ollscoil i nGaillimh, agus conradh ag an Roinn leis an ollscoil sin, agus d’fhógair an t-údarás áitiúil go raibh folúntas ann do bhainisteoir agus níor luaigh siad aon riachtanas ó thaobh Gaeilge de. Scríobh mé chuig an Aire agus táim fós ag fanacht ar fhreagra. Seo cathair dhátheangach ar thairseach an Ghaeltacht is mó sa tír. Cén chaoi ar féidir leis sin tarlú tar éis an méid oibre atá déanta ag an Roinn agus ag an gcoiste? Cén chaoi an bhfuil siad sásta post mar sin a fhógairt gan an Ghaeilge a lua? An bhfuil na finnéithe ar an eolas faoi sin?