Éamon Ó Cuív (Galway West, Fianna Fail) | Oireachtas source

Tá seacht mbliana againn. Nach mbeadh sé i bhfad níos éasca go ndéarfadh an Rialtas - ní féidir na finnéithe é a rá - go gcaithfidh méid áirithe airgead a chaitheamh chun cúrsaí a chur ar fáil le daoine a oiliúint chun a ngnó a dhéanamh trí Ghaeilge? Glacaim leis nach mbeidh cúrsaí iomlána leighis ann ach is féidir modúl a chur ar fáil do dhochtúirí agus d'altraí. D'fhéadfadh modúl comónta a bheith ann; is cuma cén chaoi a gcuirfear ar fáil é. Tá go leor daoine a fhágann meánscoileanna lán-Ghaeilge ach, faoin am go bhfuil ceithre bliana caite san ollscoil acu, níl siad in ann feidhmiú trí Ghaeilge ar chor ar bith. Tá na figiúirí ag taispeáint é seo an t-am ar fad. Bíodh an taighde ar bun ach tá a fhios agam agus ag an Dr. Mac Cormaic cén toradh a bheadh ann. Níl leath-dhóthain daoine sa tír seo.

Dá mba rud é go raibh 500,000 ag labhairt Gaeilge go laethúil sa tír seo i measc an phobail, ní bheadh an fhadhb seo ann. Níl ach 80,000, áfach, agus má thógtar seandaoine agus gasúir as, tá an pota ró-bheag. Caithfimid an pota sin a mhéadú go praiticiúil, go mór mór iad siúd atá óg agus a bheidh, as seo go ceann seacht mbliana, ag tóraíocht postanna éagsúla sa tseirbhís phoiblí. Ina measc, táimid ag labhairt faoi mhúinteoirí, altraí, dochtúirí, státseirbhísigh agus mar sin de, ina mbeidh tóir orthu.