Dr. Aodh?n Mac Cormaic:

Táimid tosaithe cheana féin. Caithfear struchtúr nua a chur i bhfeidhm le tabhairt faoin bpróiseas seo. Tá obair ar bun ag an aonad leis an Roinn Breisoideachais agus Ardoideachais, Taighde, Nuálaíochta agus Eolaíochta maidir le scéim printíseachta. Tá lead-in time ansin le scéim printíseachta idir 18 mí agus dhá bhliain le haon cheo, is cuma trí Ghaeilge nó aon saghas printíseachta atá á fhorbairt faoi láthair. Táimid tosaithe ar an aistear sin cheana féin ag iarraidh go mbeimid réidh in 2025 le haghaidh scéim printíseachta a chur ar bun trasna an chórais Stáit. Tá oifigeach sinsearach ón Roinn Caiteachais Phoiblí, Seachadta PFN agus Athchóirithe ar an gcoiste comhairleach agus tá an Roinn sin ar an eolas faoin obair atá ar bun. Tá Emily Maloney agus Sadhbh Ó Cinnseala ag labhairt, ar ndóigh, leis an Roinn Breisoideachais agus Ardoideachais, Taighde, Nuálaíochta agus Eolaíochta chun stiúradh a fháil tríd an bpróiseas sin. Tá obair chasta ar bun faoi láthair chun an rud sin a réiteach agus beidh go leor imreoirí sa ghort ansin, de réir mar a théimid tríd an bpróiseas.

Is sampla amháin é sin de na rudaí atá ar bun cheana féin. Táimid tosaithe cheana féin ag breathnú air agus ag plé leis an Government Information Service, GIS, maidir le scéim a thabhairt isteach chun daoine a fháil isteach sna rannóga cumarsáide, is iad sin na rannóga preasa istigh sna Ranna éagsúla, le freastal a dhéanamh ar an éileamh sin. Is é sin chun daoine a fháil a fhreastalóidh ar ábhair a thagann isteach ar na meáin shóisialta. Beidh an dualgas nua sin le teacht i bhfeidhm anois.

Tá stuif ansin ar féidir linn a dhéanamh. Nílimid mar sclábhaithe don straitéis nó don phleanáil. Má tá aon rud ann gur féidir linn a dhéanamh anois, táimid ag tabhairt faoi sin. Is éard a fheicimid san obair seo na chuile doras a osclaímid, táimid ag dul i ngleic leis le foireann nua. Tá 11 duine ag obair nó a bheidh ag obair san aonad nuair a bheidh an fhoireann uilig fostaithe. Táimid i lár próisis agus tá tuilleadh daoine á gcur ag obair air seo.

De réir mar a osclaímid doras amháin nó nuair a théimid síos bóthar amháin, tugaimid faoi deara go bhfuil deiseanna eile ansin. Thugamar é sin faoi deara agus muid ag plé le OneLearning, mar shampla, i dtaobh TEG a thabhairt isteach go córas na státseirbhíse. Tá cinneadh déanta anois go mbeidh OneLearning ag dul faoin Institute of Public Administration, IPA, agus ag plé, b'fhéidir, le deiseanna poiblí níos leithne. B'fhéidir go bhfuil deis ansin againne TEG a chur i bhfeidhm trasna na seirbhíse phoiblí láithreach bonn. Táimid ag oscailt doirse agus ag feiceáil doirse eile amach romhainn. Táimid cinnte go bhfeicfimid fás ag teacht ar an obair seo sa chúpla bliain amach romhainn. An bhfuil Sadhbh Ó Cinnseala ag iarraidh teacht isteach anseo?