Mr. Miche?l ? h?anaigh:

Sílim go bhfuil an-deis sna fóraim réigiúnda. Tá acmhainn ansin. Tá trí struchtúr réigiúnach ag Údarás na Gaeltachta i láthair na huaire agus tá bainisteoirí agus foireann acu. Bhí na struchtúir sin ag breathnú i ndiaidh tograí áitiúla suas go dtí 11 bliain ó shin. Tá an-deis tarmligean a dhéanamh leis na coistí sin agus an fhoireann áitiúil a úsáid le meastóireacht a dhéanamh agus an t-eolas áitiúil i dtaobh an déanamh suas a bheidh ar an gcoiste réigiúnach a úsáid ó thaobh bhaill an údaráis.

Tríd sin, d’fhéadfaí deontais suas go leibhéal áirithe a cheadú agus rud a bheadh éifeachtach agus a chuirfeadh le héifeacht na mbord chomh maith. Luamar ansin an méid cúramaí atá ar an mbord agus an méid tograí móra a bhíonn os comhair an bhoird iomláine. Bhainfeadh sé seo go leor den bhrú. Bheadh sé go maith ó thaobh coimhdeachta de go mbeadh an subsidiarity sin á thabhairt do na ceantair agus go dtabharfadh sé níos mó fairsinge don phríomhbhord a bheith ag déileáil ar an méid mór gnó atá le déanamh aige sin. Tá an-deis ansin. D’oibrigh sé go maith cheana. Níl aon fháth nach n-oibreodh sé go maith arís. Sílim go gcuirfí fáilte roimhe sna réigiúin chomh maith.

Luaigh mé gné eile den choiste réigiúnach, is é sin an ghné leathnaithe. Tá sé sin bunaithe ar mhúnla, rud a bhí san Acht Rialtais Áitiúla ag dul siar b’fhéidir 20 bliain ó shin, is é sin, expanded electoral area committees a bhí ansin. Thabharfaí daoine isteach leis na baill tofa le rudaí a bhain le pobal agus rudaí áitiúla a phlé le go bhféadfaí níos mó luacha a chur leis. Dar ndóigh, bheadh sé sin i gceist anseo agus an ghné teanga. Dá mbeadh an ghné sin den choiste réigiúnach leathnaithe, d’fhéadfadh sé níos mó eolais, taithí agus scileanna áitiúla a thabhairt isteach sa phróiseas agus go leor luacha a thabhairt aige.