Catherine Connolly (Galway West, Independent) | Oireachtas source

Cuirim fáilte roimh na finnéithe. Tá sé imithe go mór i bhfeidhm orm go bhfuil níos mó ná deich mbliana caite ag Anna Ní Ghallachair mar chathaoirleach. Is iarchathaoirleach í anois agus gabhaim buíochas léi as a cuid oibre. Tá Mícheál Ó hÉanaigh beagnach ar comhaois le hÚdarás na Gaeltachta. Chaith sé 40 bliain ann, de réir mar a thuigim, agus na blianta deireanacha mar phríomhfheidhmeannach. Go raibh míle maith agat. Tá réimse leathan tuairimí ag teacht os ár gcomhair le cúpla seachtain anois. Beidh sé deacair dúinn tuarascáil a chur le chéile ach tá sé an-suimiúil agus an-chabhrach.

Ó thaobh ionadaíocht do na ceantair, tá na finnéithe ag cur fáilte roimh an gcóras nua agus an ionadaíocht sheasta ag gach Gaeltacht. Tá sé sin soiléir. Tá siad ag rá go bhfuil gá le níos mó comhaltaí ó Chiarraí agus ó Thír Chonaill. Tá sé sin ráite go soiléir freisin.

Bogfaidh mé ar aghaidh go dtí na coistí réigiúnacha. Tá gá le téarmaí tagartha atá soiléir. Tá sé sin á rá ag na finnéithe. Tá Mícheál Ó hÉanaigh ag rá gur mba chóir go mbeadh siad bunaithe ar an struchtúr atá ann faoi láthair, na trí choiste atá ag Údarás na Gaeltachta. An ea?