Aengus Ó Snodaigh (Dublin South Central, Sinn Fein) | Oireachtas source

Tá cúpla ceist eile agam mar bhí ár n-aoí in ann tabhairt faoi na cinn a bhí agamsa cheana féin. Tagaim ar ais go dtí an cháilíocht seo. Bhí bealach eile ann nuair a bhí scéim labhairt na Gaeilge ann. Níl sé ann anois. An bhfuil daoine ag lorg go dtiocfaidh sé sin ar ais le go mbeadh siad in ann é a úsáid amach anseo chun cuidiú le coinníoll a bheith ann maidir le vóta a bheith ag daoine i dtoghchán an údaráis amach anseo? Is ceist mhór í an coinníoll agus seachas ag dul siar ar an stuif ag B2, bhí ceisteanna ann maidir leis na hiarrthóirí chomh maith agus ar gá dóibh a bheith ina gcónaí sa Ghaeltacht, ceangailte leis an nGaeltacht, nó ag obair ann. Is é ceann de na fáthanna a ardaím an cheist sin ná go measaim gur ardaíodh an cheist seo an tseachtain seo caite nuair a bhíomar ag plé leis seo mar go bhfuil daoine ann atá ag obair sa Ghaeltacht, is as an nGaeltacht dóibh, ach toisc na srianta ó thaobh tithíochta de, nach féidir leo a bheith lonnaithe sa Ghaeltacht ó thaobh a gclann de, ach go mbeadh siad go maith ina dtaobh sin de seachas sin. Tuigim an fáth go bhfuil daoine ag iarraidh go mbeadh lucht na Gaeltachta ag déanamh bainistiú orthu féin tríd an údarás agus tríd an mbord ach caithfimid a bheith cúramach nuair atáimid ag caint faoi sin.

Tá an finné tar éis labhairt arís ansin maidir leis na naíonraí nó an luathoideachas agus an córas sin agus nach bhfuil coinníollacha teanga ann agus ar chóir go mbeadh siad ann. Níl a fhios agam faoi sin, ach is dóigh liom go raibh Gearóid ó Tuathaigh ag labhairt faoi cé chomh tábhachtach is atá na luathbhlianta sin. Luaigh Sorcha Ní Chéilleachair féin é seo freisin. An bhfuil gá go mbeadh cuidiú ann agus go mbeadh an t-údarás ag díriú isteach ar an gceist seo, ar a laghad nuair a bheadh na cumhachtaí breise aige, agus go mbeadh deontais bhreise ar fáil anuas ar na gnáthdheontais a fhaigheann naíonraí, nó an grúpa Gligíní tá á eagrú ag an bhfinné, de bharr cé chomh tábhachtach is atá sé sin i súile na dteangeolaithe ar fad? Ar chóir go gcuirfimid an t-airgead, an maoiniú nó na háiseanna ar fáil go háirithe ag an aois sin agus é a tharraingt ó Ranna eile, mar go bhfuil sé sin beagnach níos tábhachtaí ná aon rud eile ó thaobh tharrtháil na teanga atá againn?