Aindrias Moynihan (Cork North West, Fianna Fail) | Oireachtas source

Ní hé an chomhairle contae a bhfuilim ag díriú isteach ar in aon chor ach, mar shampla, duine d'fhoireann an údaráis nó duine atá bainteach le coiste éigin a bhfuil dlúthcheangal leis, is é sin, comharchumann nó rud mar sin. Tá córas ann chun plé le coimhlintí ach an dóigh le Sorcha Ní Chéilleachair go mbeadh cosc ar dhaoine seasamh dá mba rud é go raibh siad mar chuid den fhoireann? An chóir go mbeadh cosc ar éinne seasamh nó an chóir go mbeadh an rogha iomlán ag an bpobal? Cén saghas srianta gur chóir a bheith ann? Fág ar leataobh an chomhairle contae toisc gur díospóireacht eile é sin agus b'fhéidir nár aontóimis air. An ndíreoidh an finné isteach ar cheist na srianta agus foireann an údaráis, comharchumainn agus mar sin de? Go minic, is iad sin na daoine a bhíonn an-ghníomhach sa phobal. Is minic go mbíonn na daoine céanna bainteach le cúpla coiste.