Ms Sorcha N? Ch?illeachair:

Is dócha gur deacair é teacht ar dhuine sa Ghaeltacht nach bhfuil coimhlint aige nó aici le rud éigin. Bíonn na daoine céanna bainteach le an-chuid rudaí. Bíonn córais ann le tabhairt faoi na coimhlintí sin ag gach aon eagraíocht. Mar sin, ní bheinn an oiread imní orm faoin gcoimhlint ón taobh sin de. Is dócha go bhfuil an Teachta ag caint faoin gcoimhlint a bheadh ag duine éigin atá tofa cheana féin mar chomhairleoir contae nó a leithéid. Táimse ag ceapadh gur maith an rud é go bhfuiltear ag iarraidh cúrsaí polaitíochta a sheachaint. Níl a fhios agam conas a n-éireofar na cúrsaí sin a sheachaint go hiomlán nó an féidir é sin a dhéanamh.

Tá a fhios agam gur deineadh iarrachtaí san am atá caite agus nár dhein sé mórán difríochta i ndáiríre. Is dócha go bhfuil agus go raibh toghcháin an údaráis ar chomhchéim nó cosúil le toghcháin chomhairle contae. Ba iad na daoine céanna a bhí ag dul sa dá thoghchán an-chuid den am. Is rud difriúil é. Ó thaobh cúrsaí polaitíochta, comhairlí contae agus rudaí mar sin de, táim ag ceapadh nach dtagann an dá rud le chéile. Dá mbeadh duine maith ag rith i dtoghchán bhord an údaráis, ní ceart go mbeadh sé sin ina chéad chéim eile le bheith ina Theachta nó ina Sheanadóir. Níor cheart go gcuirfeadh sé le slí bheatha mar pholaiteoir.