Ms Sorcha N? Ch?illeachair:

Bhíodh cead ag na meáin isteach go dtí cruinnithe den údarás. Bhí sé sin ann suas go dtí 2012, cinnte. B'fhéidir go raibh sé ann beagáinín ina dhiaidh sin ach nach raibh an oiread béime air mar nach raibh daoine tofa. Tagraím arís don ainmhí faoi leith atá i gceist le bord an údaráis. Is leath agus leath é. Tá leath a bhaineann le cúraimí chomhairle contae agus díospóireachtaí a bheith ar bun faoi cheisteanna a bhaineann leis an bpobal agus atá in ann tuairisciú a dhéanamh ar na ceisteanna agus díospóireachtaí sin. Bhíodh díospóireachtaí iontacha agus cainteoirí iontacha ag bord an údaráis. Tugadh é sin le fios ar na meáin. Tá na meáin éagsúla anois ann. Tá an raidió, an teilifís, na meáin clóite agus an tIdirlíon ann. Mar sin, bíonn ceisteanna agus ábhair idir lámha ag an údarás a bhaineann leis an bpobal, ceisteanna pleanála teanga, ceisteanna fostaíochta agus ceisteanna fiontraíochta ina measc. Tá guth an phobail ag teastáil agus tá an díospóireacht ag teastáil. Is slí é chomh maith le daoine sa phobal a ghríosú chun díospóireachta agus chun spéis a chur i gceisteanna mar sin. Is é sin an rud is mó a bheinn ag súil leis. Táim ag súil go mbeadh sé mar a bhíodh nuair a bhíodh na meáin ann. Ar ndóigh, tuigim go mbíonn cúrsaí inmheánacha agus rudaí nach féidir iad a phlé sna meáin á bplé chomh maith ach bhíodh sé sin i gceist. Bhíodh leath agus leath ann. Bhíodh seisiúin rúnda faoi leith ann agus bhíodh seisiúin phoiblí ann. Is leis sin a bheinn ag súil.