Seán Kyne (Fine Gael) | Oireachtas source

Dúirt Sorcha Ní Chéilleachair nach scaoiltear isteach na meáin go dtí na cruinnithe fiú. Sílim go ndearnadh uair amháin. B’fhéidir go mbeadh a fhios ag an Teachta Ó Cuív. Is í an fhadhb atá agamsa leis an rud seo ná go bhfuilimid ag déileáil le bord Stáit ach, ag an am céanna, táimid ag caint faoi dhaoine a bheidh tofa. In aon bhord Stáit eile, ní bhíonn baill den bhord ag labhairt leis na meáin faoi na rudaí a bhíonn ar siúl ag na cruinnithe. Ní bhíonn baill ón Industrial Development Authority, IDA, hiontraíocht Éireann, Úisce Éireann ná Feidhmeannacht na Seirbhíse Sláinte ag labhairt leis na meáin. Bíonn córas ann ó thaobh an phríomhfheidhmeannaigh agus chathaoirleach an bhoird. Is í sin an chaoi a bhfeidhmíonn sé sin. Bíonn aon bhord ag déileáil le rudaí atá faoi rún, rudaí atá sé ag obair orthu ó thaobh infheistíocht agus deacrachtaí maidir le comhlachtaí agus eile. An bhfuil sé ceart go mbeadh daoine ag fágáil an bhoird agus ag dul amach ag lorg Chóilín Ó Neachtain?