Ms Sorcha N? Ch?illeachair:

Is ceantar tíreolaíoch í an Ghaeltacht agus ní ceantar síceolaíoch ná teangeolaíoch. An dtuigeann an Seanadóir cad atá i gceist agam? Tuigim cad atá sé ag rá – go bhféadfaí feachtas a rith agus daoine faoi leith a thoghadh nach mbeadh ag teacht as na ceantair láidre Ghaeltachta, nach mbeadh ar son na Gaeltachta nó nach mbeadh tuiscint acu. Léigh mé na moltaí ó Shinn Féin ar maidin. B’fhéidir go bhféadfaí é sin a sheachaint trí cheantair bhardasacha a chur ar bun, mar atá ar bun in áiteanna eile, nó na bardaí a dhéanamh amach agus cúpla limistéar pleanála teanga a chur le chéile. D’fhéadfaí na limistéir pleanála teanga láidre a chur le chéile agus b’fhéidir go mbeadh ionadaíocht níos mó ó na ceantair sin le hais na gceantar eile ar imeall na Gaillimhe nó mar sin. Níl an cuma ar an scéal go mbeidh teorainneacha na Gaeltachta athraithe idir seo agus an toghchán. B’fhéidir go gcuirfear barda eile ansin agus go mbeadh ionadaíocht níos mó ann ach ní fheadar. Níl a fhios agam cad é an réiteach ar an gceist sin mar níl Gaelainn ach gach aon duine sa Ghaeltacht agus tá leibhéil dhifriúla Ghaelainne ag daoine sa Ghaeltacht. Is cinnte gur mba cheart tús áite a thabhairt do na daoine a bhfuil spéis acu sa teanga agus na daoine a bhfuil an teanga acu. Ó thaobh daoine nach bhfuil, agus táim ag glacadh leis go bhfuil an Seanadóir ag caint faoi dhaoine ar imeall na Gaeltachta agus imeall chathair na Gaillimhe, b’fhéidir go mbeadh bealach againn é sin a chur i bhfeidhm dá mbeadh na bardaí sin ann.