Ms Sorcha N? Ch?illeachair:

Ní hé go bhfuil aon mhór-obair ná aon mhór-mhachnamh déanta againn ar chúrsaí inscne ach an rud a bhí mé ag moladh ná go mbunófaí fóram na mban sa Ghaeltacht. Bheadh cuireadh oscailte ann do mhná nó b’fhéidir go n-ainmneofaí iad nó go mbeadh struchtúr éigin ann a thabharfadh deis do mhná iad féin a chur in iúl agus tacaíocht a fháil óna chéile. Tá an-chuid mná ag obair sa chóras poiblí sa Ghaeltacht. B’fhéidir nach bhfuil siad ag leibhéal ard bainistíochta ach tá go leor mná ann. B’fhéidir gur deis é sin go bhfaighidís roinnt tacaíochta agus cúnaimh agus mar sin de ag an bhfóram seo. D’fhéadfaí gur slí nó bealach é sin le hainmniúchán a fháil nó ugach a thabhairt dóibh seasamh i dtoghchán. Sin a bhí i gceist agam, fiú dá mbeadh cúpla suíochán ar bhord an údaráis leagtha amach d’fhóram na mban. Bealach é sin le cinntiú gur mná cumasacha iad chomh maith. Níl mé ag rá nach bhfuil aon bhean chumasach ag obair sna róil sin. Bíonn i gcónaí.

Ó thaobh na gcumhachtaí is dóigh go raibh mé ag iarraidh a rá, mar nach bhfuil aon eilimint den daonlathas, nó mórán daonlathais, ar bhord an údaráis faoi láthair nach bhfuil na guthanna sin á gcloisint againn. Níl siad ar na meáin. Níl a fhios agam cén uair dheireanach a chualamar aon bhall de bhord Údarás na Gaeltachta ag labhairt sna meáin ach amháin an cathaoirleach nó b’fhéidir na comhaltaí tofa ó na comhairlí contae mar gheall gur comhairleoirí contae iad féin iad. Ba cheart go mbeadh guth mhuintir na Gaeltachta ar bhord an údaráis agus go gcinnteodh an daonlathas é sin. Sin a bhí mé ag iarraidh a rá - go n-athródh an eilimint dhaonlathach sin é seo agus go mbeidís ag cur ghuth na Gaeltachta in iúl chomh maith ar bhord an údaráis. Níl mé ag rá nach bhfuil sé sin ar bun faoi láthair ach níl sé soiléir.

Ó thaobh na meáin, bíonn na meáin ceadaithe isteach ó am go chéile ach is go heisceachtúil a tharlaíonn sé anois. Bhíodh cead acu dul isteach go minic. Is bealach eile é sin an pobal a choimeád ar an eolas faoi rudaí agus tugann sé údarás agus poiblíocht do chúrsaí.

Tá muidne mar chuid den chóras pleanála teanga. Táimid ag obair go dlúth leis na hoifigigh phleanála teanga agus tá an obair ar bun ag leibhéal pobail. B’fhéidir nach bhfuil sí ach ina tús ach tá sí ar bun. Níl a fhios agam an bhfreagraíonn sé sin na ceisteanna.