Professor Conch?r ? Giollag?in:

Sin ceist mhaith ag an Teachta. Táim ag ceapadh go dtagann ceist eile roimhe sin, sé sin, ceist na gcumhachtaí. Caithfimid aghaidh a thabhairt ar na pointí ar fad a léiríodh sna tuarascálacha taighde ar fad. An chontúirt mhór atá ann don phobal ná ceist na hábharthachta, nó relevance - an bhfuil an t-údarás mar atá sé ábhartha don bhrú atá ar an bpobal? Is dóigh go léiríonn cuid den fhianaise atá ann nach bhfuil. Mar sin, an cheist atá ann ná cén chaoi athmhúnlú a dhéanamh ar an údarás? Is é Údarás na Gaeltachta an foras is láidre Stáit atá ag na Gaeil sa Ghaeltacht. Is mar gheall air sin a mhol mé grúpa sainchomhairliúcháin le comhoibriú leis an údarás agus leis an Stát le hathmhúnlú a dhéanamh ar na forais a bhfuil cúram na Gaeltachta orthu, le teacht i gcabhair ar phobail atá i mbaol a mbáite sa mhórphobal teanga sa Stát seo. Freagróidh mé an cheist le ceist eile. An bhféadfadh an t-údarás maireachtáil níos faide ná an pobal teanga, an pobal Gaelach? Sin an chontúirt. Níl aon mhaith a bheith ag caint ar chumhachtaí gan a bheith ag caint ar an gcomhthéacs sóisialta a bhfuil an pobal sin ann.