Mr. Donncha ? h?allaithe:

B’fhéidir gur tharla sé roimh an Teachta nó ina dhiaidh ach cinnte bhí whip á chur i bhfeidhm mar chualamar ó bhaill nach bhféadfaidís vótáil ar leithéid de rud mar gheall go raibh whip i bhfeidhm ann. Ní dóigh liom gur rud maith é sin. Ceapaimse gur fearr go mbeadh ionadaithe gan aird dírithe acu ach ar a mballraíocht d’Údarás na Gaeltachta, seachas a bheith idir cúpla eagraíocht. I dtosach báire, bheadh a ndóthain le déanamh acu a bheith ar cheann amháin gan a bheith ar an iomarca. Glacaim leis go bhféadfadh togha daoine a bheith ina gcomhairleoirí contae agus go ndéanfadh sé an-leas dóibh a bheith ar Údarás na Gaeltachta freisin ach leis an mórphictiúr, feictear domsa go mbeadh sé i bhfad níos fearr go mbeadh daoine tofa mar go bhfuil siad ag iarraidh bheith ar Údarás na Gaeltachta agus gan é sin a fheiceáil mar chéim pholaitiúil in aon bhealach, le nach mbeadh an t-údarás chomh polaitiúil is a bhí an seanúdarás. Sin an fáth go mbeinnse i bhfabhar gan cead a bheith ag comhairleoirí contae a bheith ar bhord an údaráis.