Catherine Martin (Dublin Rathdown, Green Party) | Oireachtas source

Tá maoiniú breise curtha ar fáil ag mo Roinn do thionscail agus cláir nach dtagann faoi scáth an Chomhairle Aireachta Thuaidh-Theas. Mar shampla, cuireadh €300,000 breise ar fáil do chlár na leabhar Gaeilge mar chuid de bhuiséad 2023 agus fógraíodh €300,000 breise d’Fhoras na Gaeilge ag tús na bliana chun tacú le hearnáil na foilsitheoireachta. Chomh maith leis sin, fógraíodh go raibh €300,000 eile curtha ar fáil ag mo Roinn do thionscadal foclóireachta de chuid an fhorais. Fágann sé seo go bhfuil €900,000 breise curtha ar fáil ag mo Roinn go díreach chuig Foras na Gaeilge le tamall beag anuas.

Ní miste a lua go bhfuil mo Roinn an-ghníomhach maidir leis na hiarrachtaí atá ar bun aici teacht ar bhealaí eile chun tacú tuilleadh le pobal na Gaeilge ar fud na tíre, i gcomhar le ceanneagraíochtaí Fhoras na Gaeilge chun go mbeadh sé ar a gcumas an teanga a chur chun cinn agus a threisiú. Chuir mo Roinn €150,000 ar fáil do Chonradh na Gaeilge anuraidh mar chiste spreagtha i gcomhar le Seachtain le Gaeilge, agus tá €200,000 eile ceadaithe le déanaí mar chiste 2023. Chomh maith leis sin, cuireadh €280,000 ar fáil don chonradh chun feachtas gluaiseachta a reáchtáil le dhá bhliain anuas leis an aidhm daoine óga a spreagadh chun an Ghaeilge a úsáid agus eolas a thabhairt dóibh faoi dheiseanna fostaíochta leis an teanga san Eoraip agus anseo in Éirinn.

Tá maoiniú de €325,000 ceadaithe don togra Baile Átha Cliath le Gaeilge de chuid Chonradh na Gaeilge don tréimhse 2022 go 2024. Tá €290,000 eile curtha ar fáil d’Fhondúireacht Sheosaimh Mhic Dhonncha agus don scéim teanga tí atá á reáchtáil ag na ceanneagraíochtaí Glór na nGael agus Gaeloideachas Teoranta. Fógraíodh ag tús na bliana €80,000 d’Oireachtas na Gaeilge le tús a chur le forbairt áiseanna cartlanna i gcomhpháirtíocht le Fiontar agus scoil na Gaeilge in Ollscoil Chathair Bhaile Átha Cliath. Beidh an maoiniú seo mar thaca don oireachtas le clár iomlán a fhorbairt chun cartlann nua dhigiteach a chur ar fáil ar líne sna blianta amach romhainn. Tá pleananna againn do mhaoiniú suntasach breise i scéim Gaelbhratach.