Éamon Ó Cuív (Galway West, Fianna Fail) | Oireachtas source

Nuair a bhíonn Aire i mbun Roinne, tá ionchur an-mhór ag an Aire ar an gcaoi a ndéantar leithdháileadh den mhaoiniú ar fáil a chuirtear ar fáil don Roinn, idir na cinntí ar fad agus cé orthu a chuirtear béim ó thaobh airgid de. Go hiondúil, bíonn an tAire Caiteachais Phoiblí, Seachadta ar an bPlean Forbartha Náisiúnta, agus Athchóirithe ag iarraidh a fháil amach céard é atá an tAire ag dul ag caitheamh ach ag deireadh an lae, is é an bhunlíne a bhíonn ag cur as dóibh siúd seachas an mion bhriseadh síos taobh istigh den leithdháileadh. Tá tionchar ollmhór ag an Aire ar bhreis airgead a thabhairt do na healaíona, don chultúr nó don Ghaeilge. Thuig mise gurbh é sin an rud a raibh an coiste ag iarraidh a fháil amach.