Aengus Ó Snodaigh (Dublin South Central, Sinn Fein) | Oireachtas source

Tá na finnéithe atá os ár gcomhair lonnaithe sa seomra coiste, maraon leis na comhaltaí ar fad atá linn go dtí seo. Fearaim fáilte roimh na comhaltaí, roimh aon chomhalta eile a dhéanfaidh freastal ar an gcruinniú, roimh na finnéithe atá le labhairt os ár gcomhair inniu agus roimh ár lucht féachana ar sheirbhís teilifíse an Oireachtais. Fearaim fáilte roimh an Aire Turasóireachta, Cultúir, Ealaíon, Gaeltachta, Spóirt agus Meán, an Teachta Catherine Martin, agus roimh oifigigh a Roinne: Katherine Licken, Ard-Rúnaí; Tríona Quill, rúnaí cúnta; Aodhán Mac Cormaic, stiúrthóir na Gaeilge; agus Eoin Ó Droighneáin, príomhoifigeach. Táimid anseo i seomra coiste 4 i dTithe an Oireachtais. Toisc gur Comhalta Thithe an Oireachtais í an tAire, ceapaim nach gá na gnáthrialacha i dtaobh finnéithe a léamh amach. Tá siad ar eolas againn ar fad. Ní rachaidh mé tríothu ar fad. Agus é sin ráite, meabhraím d'fhinnéithe déanamh cinnte de go bhfuil a ngutháin shoghluaiste múchta le linn an chruinnithe mar cuireann siad as don chóras taifeadta atá ar siúl.

Is iad an dá ábhar atá le plé againn inniu ná leithdháileadh airgid na Roinne Turasóireachta, Cultúir, Ealaíon, Gaeltachta, Spóirt agus Meán ar an nGaeilge agus ar an nGaeltacht agus buiséad TG4. Molaim go dtógfar an dá ábhar le chéile mar ní fheicim go mbeidh mórán comhaltaí ann. Tá súil agam gur féidir le daoine déileáil le ceisteanna ar na hábhair sin atá leagtha amach: an leithdháileadh airgid agus buiséad TG4. Anois déanfaimid ár mbreathnú ar na hábhair seo. Is féidir leis an Aire a ráiteas tosaigh a thabhairt.