Seán Kyne (Fine Gael) | Oireachtas source

Cuirim fáilte roimh Mháire Uí Choilm agus Sally Uí Rabhartaigh chuig an gcoiste. Is léir óna gcur i láthair go bhfuil níos mó le déanamh sa ról ná mar a bhíodh agus go bhfuil níos mó dualgas orthu mar mhná tí.

Luadh pointe fíorthábhachtach faoi na haláraim dhóiteáin agus an bhfuil airgead ar fáil dóibh. B'fhéidir go mbeimid in ann é sin a ardú leis an Roinn. Is rud an-tábhachtach é do scoláirí mar go dteastaíonn tithe sábháilte uathu, agus ba cheart go mbeadh deontas ar fáil le haghaidh aláraim dóiteáin.

Dúradh go bhfuil sé ocht nó naoi mbliana ó fuair mná tí ardú. Cheadaigh mise ardú beag nuair a bhí mé mar Aire Stáit. Níl mé cinnte cén bhliain ach bhí ardú beag ann thart ar 2016 nó 2017. B'fhéidir go bhfuil a fhios ag an Teachta McHugh. Bhí ardú beag ann thart ar an am sin.

Tá impleacht mhór ag Covid ar líon na dtithe atá ar fáil. Thart ar cheantar na bhfinnéithe, an bhfuil laghdú mór ar líon na mban tí a chuireann seirbhísí ar fáil?