Ms Eimear Kilrane:

Is é an rud céanna é leis an stair, mar is múinteoir staire mé freisin agus tá sonraíocht na staire bunaithe ar thorthaí foghlama freisin. Tá trí shnáithe sa stair, mar shampla, a luafaidh mé os comhair an choiste. Is é an chéad snáithe atá i gceist sa stair ná nádúr na staire agus is scileanna atá i gceist ansin. Maidir leis an dá shnáithe eile atá ann, is ábhair atá iontu. Is iad sin stair na hÉireann, agus stair na hEorpa agus an domhain. Is féidir obair le chéile chun na scileanna sin a fhorbairt agus na scileanna atá luaite sna torthaí foghlama sa chéad shnáithe a bhaint amach, ach tá rud éigin sonrach ann agus is féidir é a mheas.

Níl an rud céanna ann sa Ghaeilge agus sin í an fhadhb.