Catherine Connolly (Galway West, Independent) | Oireachtas source

Tá fáilte roimh na finnéithe agus gabhaim buíochas as an dua a chuir siad orthu féin. Tá na ráitis tosaigh léite agam. Tá an t-uafás eolais, moltaí agus mionsonraí iontu. Tá a fhios agam nach bhfuil sé sin éasca.

D’fhiafraigh Claire Ní Mharcaigh cá bhfuil ár dtriail ach mo cheist ná cén chaoi a bhfuilimid ag an bpointe seo. Cad atá tarlaithe go bhfuil ar na finnéithe teacht os ár gcomhair? Ní coiste oideachais muid. Ba chóir go mbeadh an córas in ann déileáil le haisfhreagra ó na múinteoirí agus ó na hionadaithe. Cén fáth an bhfuilimid ag an bpointe seo?

Dúirt Shane Ó Coinn go bhfuil athbhreithniú ar siúl faoi láthair. Iarraim air sonraí a thabhairt dúinn faoi sin, agus soiléireacht ó thaobh an scrúdú cainte. Tá a fhios agam nach bhfuil aon scrúdú cainte i gceist ach nach ndéantar scrúdú cainte laistigh den rang agus nach dtéann cuid de na marcanna chuige sin? Tá mé beagán measctha ón méid atá léite agam. Tá sé soiléir dom nach bhfuil aon scrúdú cainte ann ach ón bpíosa a léigh mé cheap mé go raibh rud éigin laistigh den rang ón múinteoir féin.

Rachaidh mé ar ais ag DEIS ach baineann sé seo le gach scoil i ndáiríre. Tá easpa acmhainní ann. Tá coiste faoi leith againn taobh amuigh den choiste seo atá ag iarraidh an Ghaeilge a chur chun cinn sa Dáil. Táimid i gcónaí ag caint faoin dea-thoil. Tá an Ghaeilge maraithe leis an dea-thoil. Tá sé ann. Roimh dheireadh na míosa seo chugainn, beidh tuarascáil á réiteach againne. Tá mé á lua seo mar níl easpa tola nó easpa suime ann ach tá easpa deiseanna a fheileann do na Teachtaí, na Seanadóirí agus na daoine ar an talamh. Tá sé mar an gcéanna do na daltaí. Cad iad na hacmhainní breise atá ann, nó atá aimsithe ag an Roinn nó ag na finnéithe, ó thaobh deiseanna a thabhairt do dhaoine freastal ar na Gaeltachtaí uilig? Tá sé ródhaor dóibh, gan dabht. Sin rudaí praiticiúla ach iarraim ar na finnéithe labhairt go ginearálta freisin.