Mr. Seaghan Mac Cormaic:

Chuir an Teachta ceist ansin faoi scoláirí laga agus an bhéaltriail. Tá cuid mhór blianta déanta agam mar scrúdaitheoir béaltrialach ag an ardteistiméireacht. Tá scoláirí laga in ann éirí leo sa scrúdú sin ag an ardteistiméireacht. Is féidir scrúdú a bheith ann inar féidir le scoláirí laga agus scoláirí láidre éirí leo. Más rud é go bhfuil na scoláirí laga ábalta pas a fháil ann, is leor é sin. Is féidir é a dhéanamh. Tá sé le feiceáil ag leibhéal na hardteistiméireachta. Tá sé sin tábhachtach. Rinne mé béaltrialacha le scoláirí laga roimhe seo sa seanchóras. Bhíodh neart acu ó scoileanna DEIS ag teacht isteach gan ullmhúchán ar bith déanta ach amháin an méid a rinneadh sa seomra ranga féin. Roinnt acu, ní dhéanann siad mórán staidéir nuair a théann siad abhaile. Caithfear go bhfuil siadsan ábalta éirí leo tar éis cleachtadh a dhéanamh sa seomra ranga. Is féidir é a dhéanamh. Feictear é sin san ardteistiméireacht.

Ó thaobh rudaí dearfacha faoin tsonraíocht nua, is maith liom nuair a léiríonn daltaí rud éigin faoina saolta féin os comhair an ranga. Níl a fhios agam an aontaíonn gach duine liom ansin. Is maith liom an dóigh go ndéanann siad féin-mheasúnú air sin. Is gnéithe suimiúla agus dearfacha iad sin. Sin cúpla rud. Tá roinnt den litríocht go maith agus suimiúil chomh maith.