Ms Anne Loughnane:

Is dóigh liom nach bhfuil aon réiteach simplí mar sin ann mar tagann an rud go léir ar ais go dtí an meon agus na rudaí atá os a gcomhair. Tá scéal agam má tá nóiméad dó. Ní mhúinim na teangacha iasachta - múinim Béarla - ach chuaigh mé isteach le dalta tar éis na hardteiste chun na leabhrán scrúdaithe a thagann ar ais a fheiceáil. Fuair an dalta marcanna an-ard, na marcanna céanna sna hábhair. Agus muid ag féachaint orthu, chonaiceamar an méid a bhí scríofa sa Ghaeilge, páipéar tiubh a bhí ann, agus nuair a chuamar ar aghaidh go dtí an Fhraincis, bhí an páipéar an-tanaí ar fad. Ní suirbhé ceart é sin ach, os mo chomhair amach, is léir go bhfuair an dalta an marc céanna, marc an-ard, ach bhí níos lú ná leath ann ó thaobh scríbhneoireachta de. Tá fadhb ann idir na rudaí mar sin. B'fhéidir nach é sin an t-aon fhadhb amháin ach is rud mór é.