Mr. Caoimh?n ? hEaghra:

Ba mhaith liom tacú leis an méid sin. Cinnte, ábhar práinne a bhí sa pholasaí don oideachas Gaeltachta. Ag an am céanna, bhíomar san earnáil ag iarraidh an polasaí don oideachas lán-Ghaeilge ach cuidíonn an polasaí Gaeltachta fós go huile is go hiomlán le cás polasaí don oideachas lán-Ghaeilge agus do mhúineadh na Gaeilge. Tá sé seo níos leithne.

Tá tús curtha ag an Roinn Oideachais le hullmhúchán don pholasaí don oideachas Gaeilge, ach is tús é agus ní dlús. Tá sé mall agus táimid tar éis a léiriú agus léirigh Bláthnaid Ní Ghréacháin go han-mhaith ansin an chontúirt agus an baol atá ann don earnáil, don Ghaeilge agus dúinn ar fad sa tír mura bhfeidhmítear air seo. Tá gá ag an Roinn ceannasaíocht a ghlacadh agus caitheamh go dearfach agus go gníomhach leis seo mar tá rudaí ag tarlú go mall mar gheall ar an bpolasaí don oideachas lán-Ghaeilge agus don Ghaeilge. Tá cinntí á dtógáil atá ag déanamh dochair ar nós an ceann maidir leis na díolúintí agus tá cinntí á nglacadh ansin nuair atá iarratais ag teacht uainn ón earnáil a rá go dteastaíonn Gaelcholáiste nó rud éigin a molaimid. Tá sé á rá linn ansin go bhfuil polasaí don oideachas lán-Ghaeilge á fhorbairt agus go mbeidh daoine ann chun plé air sin nuair a bheidh sé sin forbartha. Tá an Roinn ag cur rudaí ar an méar fhada nuair a fheileann sé agus ag ligean do dhíolúintí agus rudaí eile a theacht chun cinn. Is gá stop a chur leis seo agus dlús a chur leis an bpolasaí sin.