Catherine Connolly (Galway West, Independent) | Oireachtas source

Tá polasaí d’oideachas sa Ghaeltacht foilsithe agus tá sé go hiontach, go teoiriciúil ar aon nós, agus tá ardmholadh faighte aige. Tá sé ag dul ar aghaidh go hiontach, go teoiriciúil.

Sa Roinn chéanna, tá frithmheon ó thaobh na Gaeilge de. An bhfuilim mícheart faoi sin? Níl polasaí ar bith forbartha fós, in ainneoin thoil an Rialtais seo agus an rialtais dheireanaigh go bhforbrófar polasaí don Ghaeilge lasmuigh den Ghaeltacht. Níl sé sin déanta agus táimid ag feidhmiú i bhfolús, i ndáiríre, an t-am uilig.

Ansin, tá cinntí á ndéanamh nach luíonn le réasún, a bheag nó a mhór, ó thaobh chóras na ndíolúintí agus maidir leis an deighilt a dhéanamh san ardteistiméireacht. Ní luíonn cinntí mar sin le réasún nó leis an bhfianaise ar an talamh. Nach labhraíonn an taobh amháin leis an taobh eile sa Roinn nó cad atá in easnamh anseo? Go teoiriciúil, tá teanga oifigiúil againn agus is í an Ghaeilge. Tá polasaí iontach againn maidir leis an nGaeilge sa Ghaeltacht, mar a dúirt mé, agus ansin tá teipthe go huile is go hiomlán aitheantas a thabhairt gur bronntanas amach is amach é do dhuine a bheith dátheangach agus ilteangach. Tá teipthe go hiomlán air sin agus nuair atá riachtanais speisialta i gceist, dírítear siad isteach ar theanga amháin, gan aon fhianaise nó rud ar bith, agus gan aon mhonatóireacht á déanamh air sin. Má táim mícheart faoi sin, abair liom é.