Éamon Ó Cuív (Galway West, Fianna Fail) | Oireachtas source

Faoi láthair is é an príomhoide a dhéanann an cinneadh. Is cuma faoi na cláracha agus chuile shórt eile, chomh fada is a bhfágtar é mar sin beidh sceitheadh ann. Ag deireadh an lae, feictear domsa go bhfuil éagóir á dhéanamh ar na gasúir. Beidh siad dúnta amach ó na poist ar fad a mbeadh an Ghaeilge riachtanach dóibh. Ní hé go bhfuil socrú a dhéanamh i gcás gach uile ghasúr. Tá éagóir á dhéanamh. Tá sé seo i bhfad níos coitianta i gceantracha faoi mhíbhuntáiste, agus coinníonn sé daoine faoi mhíbhuntáiste dá bharr. Is cuimhneach liom duine a raibh aithne mhaith agam air a bhí ag obair i gceantar faoi mhíbhuntáiste. Dúirt sé gur éagóir uafásach a bhí á dhéanamh ag an bpolasaí seo fiú mar a bhí sé sna ceantair faoi mhíbhuntáiste. Is cuimhneach liom freisin a bheith thíos i Loch Garman. Baineann sé leis an gcaoi go bhfuil an rud seo go iomrascálach. Baineann sé leis an seanchóras gan trácht ar an gcóras nua. Tháinig duine den Lucht Taistil chugam agus bhí a fhios aige gur Gaeilgeoir mé. Aire a bhí ionam ag an am agus chuir sé ceist orm "An bhfuil cead ag m'iníon Gaeilge a fhoghlaim sa scoil?". Dúirt mise ”Cad chuige nach mbeadh?”. Dúirt sé go ndúradh leis nach ceart agus nach raibh cead ag an Lucht Taistil Gaeilge a fhoghlaim. Tá an rud seo ag éalú agus tá an teach trí thine agus caithfimid é a mhúchadh go sciobtha. Mar a deirim, tá céatadán na ndaoine a fhaigheann díolúine an-ard anois, agus má fhágtar ró-fhada é beidh sé an-deacair é a tharraingt ar ais, déanfar éagóir ollmhór ar an dream is laige sa tsochaí.