Mr. Alan Esslemont:

Is scéim í sin ar aontaíomar leis an Film Board-An Bord Scannán ag an am agus le hÚdarás Craolacháin na hÉireann, BAI. Táimid, BAI agus Fís Éireann ag déanamh infheistíochta ansin. Gach bliain déanaimid forbairt ar cheithre nó ar chúig de smaointe. Cuirimid thart ar €30,000 isteach chun an scenario agus an scéal a fhorbairt. Roghnaímid an péire is fearr agus cuirimid isteach ansin chun léiriúcháin iad. Beimid ag léiriú péire, is iad sin dhá scannán i nGaeilge, gach bliain go ceann i bhfad. Is é sin fad is go mbeidh an chomhpháirtíocht sin ag fanacht le chéile.

Is é an rud is suntasaí domsa ná go léiríonn sé an tallann. Cuirrimid an-bhéim ar an gcruthaitheacht atá ag tarlú trí Ghaeilge. San am atá caite, bhí roinnt rudaí feicthe agamsa, rudaí a scríobhadh i mBéarla agus a aistríodh go Gaeilge. Mar chuid den scéim seo, chuireamar an bhéim ar an nGaeilge a bheith mar bhunábhar ó thaobh na scríbhneoireachta de agus, go háirithe, don chuid is mó de na daoine atá ag plé leis an scannán.

Mar gheall air sin, is léir go bhfuil tallann den scoth anois ag feidhmiú trí Ghaeilge.

Mar gheall air sin fós, tá ag éirí le Cine4 agus tá tallann nua ag iarraidh teacht isteach do shaol theilifís na Gaeilge den chéad uair le píosa anois.