Aengus Ó Snodaigh (Dublin South Central, Sinn Fein) | Oireachtas source

Go n-éirí an t-ádh le TG4 leis sin le go mbeidh siad in ann a chur ina luí ar na comhlachtaí Stáit ar fad atá amuigh ansin go bhfuil gá, ní hamháin leis an airgead a chaitheamh trí fhógraíocht i nGaeilge, ach freisin, chun cuidiú leis na heagrais atá ag foilsiú nó ag craoladh trí Ghaeilge ar an gcéad dul síos. Is buntáiste breise atá ag na heagrais Bhéarla anseo. Is é seo an tuairimíocht a bhí ann nuair a bhí sé seo á chur chun cinn.

Tá ceisteanna eile agam. Baineann ceann amháin le “Cúla4”. Rinne TG4 éacht le linn na paindéime Covid-19 agus bhí moladh den scoth tuillte ag an gcainéal as an tslí a d'éirigh leis teacht tríd agus, go háirithe, maidir leis an bhfoireann. Ní raibh a fhios ag éinne céard a bhí ag tarlú ach fós féin d'éirigh le TG4 cuibheasach tapa cláir a chur ar fáil do scoileanna agus do pháistí a bhí gafa sa bhaile, gan aon rud eile le déanamh acu in amanna. Fós féin, bhí TG4 in ann díriú isteach ar chláir nua agus a leithéid. Tá sé go maith gurbh ann dó.

Maidir leis an straitéis do chláir dhifriúla, an féidir le Alan Esslemont cur leis an gcaint faoi céard atá i gceist le Cúla4, go háirithe?