Aengus Ó Snodaigh (Dublin South Central, Sinn Fein) | Oireachtas source

Tá an méid a bhí á rá ag Alan Esslemont faoi Freeview spéisiúil. Go n-éirí leis an gcainéal chomh tapa agus is féidir. Tá borradh ag teacht ar an nGaeilge bliain i ndiaidh bliana ó Thuaidh de, ach go háirithe i measc iad siúd atá ag freastal ar Ghaelscoileanna agus ar Ghaelcholáistí. Tá fás thar cuimse thar na blianta sa réimse sin toisc go bhfuil “Cúla4”, a bheadh mar sheirbhís ann féin tá súil againn. Tá gá leis an tseirbhís sin ó thaobh na bpáistí sin de. Bhíomar ar thuras coicís nó trí seachtain ó shin ar cheantar Charn Tóchair. Bhí sé go hiontach an fás sin a fheiceáil i gceantar iargúlta tuaithe agus an méid is féidir a dhéanamh nuair atá na tacaíochtaí ag an bpobal. Is tacaíocht í na meáin shóisialta agus na meáin chumarsáide eile dóibh siúd atá i gceantair mar sin más féidir leis an bpobal teacht orthu.

Más rud é go bhfuil aon chuidiú in aon chor arbh fhéidir linn mar choiste a thabhairt chun cuidiú leis an gcainéal, beimid sásta obair leis, le preabadh a dhéanamh, nó pé rud is gá chun a mholadh do Ofcom a dhéanamh mar ba chóir.

Ó thaobh na gceisteanna atá agamsa, baineann siad leis an méid atá curtha os ár gcomhair inniu agus is í sin aighneacht réamhbhuiséid. Cad é go díreach an tsuim airgid nó an maoiniú poiblí a thagann ón Stát go dtí TG4 faoi láthair? Tá an cainéal ag lorg méadú ar an méid atá ann faoi láthair agus luaitear an difríocht atá ann maidir le céatadán idir TG4 agus an méid atá ar fáil san Bhreatain Bheag agus i dTír na mBascach. Ó thaobh an tsuim airgid de, ámh, céard í an tsuim airgid atá i gceist.