Mr. Alan Esslemont:

Bheadh ar an Teachta an cheist sin a chur ar RTÉ. Sílim go bhfuil ról an-tábhachtach ag RTÉ ó thaobh go dtiocfadh daoine ar an nGaeilge, go háirithe RTÉ One, an áit is mó go bhfuil lucht féachana ann. Tá sé tábhachtach go mbeadh an Ghaeilge mar chuid de sin.

Táimid ag cur ar fáil, trí na comhlachtaí neamhspleácha, cláir a bhí coimisiúnaithe ag TG4 do RTÉ. Tá sé seo sláintiúil sa mhéid is go bhfaightear an luach is fearr as an airgead poiblí agus mar gheall go bhfuil ardán ag RTÉ atá níos leithne ná aon chainéal eile in Éirinn. Mar sin, tá daoine in ann teacht ar an nGaeilge níos fearr.

I ndeireadh na dála, san áit ina bhfuilimid faoi láthair, is é an rud is tábhachtaí ná scála níos mó a thabhairt do TG4 ionas go mbeidh sé in ann feidhmiú ag an leibhéal céanna le S4C nó EITB. Ag an leibhéal sin, éiríonn an comhoibriú idir TG4 agus RTÉ i bhfad níos fearr agus níos éifeachtúla. Faoi láthair, is ar éigean go bhfuil 10% de turnover RTÉ ag TG4; táimid chomh beag sin. Ach dá mbeadh níos mó scála againn, bheimis in ann i bhfad níos mó a dhéanamh i gcomhpháirt le RTÉ leis an nGaeilge a chur chun cinn. Tá saineolas againn nach bhfuil agus nach mbeidh ag RTÉ. Ní dóigh liom gur rud é a chaill RTÉ ó bunaíodh TG4. Ní dóigh liom go raibh sé riamh ann in DNA RTÉ. Tá sé an-tábhachtach go leanfaimid mar chomhpháirtithe ag cur na Gaeilge ar aghaidh.