Mr. Tadhg Mac Dhonnag?in:

Ba mhaith liom rud éigin dóchasach a rá agus muid ag caint ar “An Cailín Ciúin”. Feicim é seo ag tarlú níos mó agus níos mó le leabhair go bhfuil na meáin shóisialta ag tacú go mór le leabhair agus le díolachán. Mar a dúirt Cathal Póirtéir faoin bpróiseas, feiceann tú rud éigin luaite agus léann tú arís agus arís é. Is féidir an cineál sin éifeacht a bheith agat ar na meáin shóisialta. Tá Twitter go mór mhór an-mhaith ó thaobh poiblíochta. Tá pobal gníomhach leabhar Gaeilge agus pobal Gaeilge ginearálta ar Twitter atá an-ghníomhach agus an-bhríomhar. Is féidir Twitter a úsáid ar bhonn an-éifeachtach le leabhair Ghaeilge a chur i láthair agus le poiblíocht a dhéanamh. Is rud iontach é sin go mór mhór do fhoilsitheoirí atá lonnaithe in iarthar na hÉireann mar atá Futa Fata, Cló Iar-Chonnacht agus Leabhar Breac. Is comhlachtaí iad Cló Iar-Chonnacht agus Leabhar Breac a bhfuil go leor déanta acu ó thaobh leabhair do dhaoine fásta de, i bhfad níos mó déanta acu ná mar atá ag mo chomhlacht fhéin. Tá na leabhair sin níos deacra a dhíol agus caithfear é sin a admháil freisin.