Ms Anna Heussaff:

Maidir leis “An Cailín Ciúin”, agus tá sraith de scannáin atá ag tarraingt aird a rinneadh mar go raibh scéim maoinithe ann. Scéim an-mhaith maoinithe a bhí ann. An rud a tharla ná gur chuir comhlachtaí agus scríbhneoirí scripteanna isteach, roghnaíodh cúig cinn acu, fuair siad €25,000 an ceann le forbairt a dhéanamh ar an smaoineamh, agus ansin roghnaíodh dhá cheann acu a fuair, sílim, €1 milliún an ceann. Níl mé lánchinnte, b'fhéidir nach raibh ann ach leath sin. Ní maoiniú millteanach mór é sin i gcás scannáin ach fuair siad airgead ceart agus, mar a bhí á rá ag Tadhg Mac Dhonnagáin, bhí próiseas eagarthóireachta ann agus próiseas roghnaithe agus bhí brú ann forbairt a dhéanamh ar an rud i bhfad sular tháinig sé chuig an bpointe go mbeadh siad amuigh ag scannánú.

Tá scannáin eile ann “Arracht” agus “Róise & Frainc”, ceann eile atá ag teacht chun cinn go luath agus a bhfuil duaiseanna buaite aige agus mar sin de. Bhí an scéim sin ann bliain i ndiaidh bliana - níl a fhios agam an bhfuil sé ar an gceathrú nó an cúigiú bliain anois. Is léiriú an-mhaith é ar an tionchar a bhíonn ag scéim maoinithe. Ba é TG4 agus Alan Esslemont mar stiúrthóir, de réir mar a thuigim, a bheartaigh ar an rud seo le scannáin i nGaeilge a chur chun cinn ar leibhéil idirnáisiúnta agus go mbeidís páirteach i bhféiltí idirnáisiúnta agus ag buachaint duaiseanna idirnáisiúnta. Déarfadh daoine in Éirinn ansin go bhféadfadh siad dul chuig an scannán i nGaeilge toisc go raibh gach duine ag caint faoi. Is é sin an rud atá tarlaithe. Léiríonn sé an sort ruda gur féidir linn a dhéanamh le scríbhneoireacht na Gaeilge ach tabhairt faoi ar bhealach córasach nó ar bhealach leanúnach. Maidir le scríbhneoirí óga agus scríobh do dhéagóirí agus don aos óg, idir abair 16-25 bliain d’aois, is gá gur scríbhneoirí óga iad cuid de na daoine atá ag scríobh dóibh agus de réir mar a fheicim ó na taifead in Eolaire na Scríbhneoirí, tá cuid mhaith de scríbhneoirí na Gaeilge níos sine seachas níos óige. Tá Tadhg Mac Dhonnagáin agus Futa Fata tar éis cothú d'aon ghnó a dhéanamh ar scríbhneoirí óga ata ag scríobh pictiúr leabhar agus leabhair eile do léitheoirí óga. Scríbhneoirí óga atá 20, 30 nó 40 bliain d'aois, ní féidir leo maireachtáil ar €5,000 sa bhliain mar ag an aois sin níl pinsean acu, níl siad in ann bheith ag braith ar a muintir agus níl siad sásta sa lá atá inniu ann bheith ag maireachtáil i mbothán sa gharraí ar feadh na mblianta as a chéile. Tá gá le cur chuige agus a rá go bhfuilimid chun cuid den bhearna seo a líonadh agus gurb iad seo na rudaí a dhéanfaimid chun tabhairt faoi.