Mr. Tadhg Mac Dhonnag?in:

Maidir leis an méid a bhí le rá ag Liam Carson, uaireanta is fearr a bheith ag caint faoi chuimsitheacht nó inclusiveness seachas cearta na Gaeilge. Dá mbeadh féile ar siúl agus dá ndúnfaí an doras don LGBTQ, mar shampla, nó do phobail mhionlaigh eile in Éirinn bheadh sé i raic. Ach bíonn an doras dúnta go minic don phobal mionlaigh is sine ar an oileán nach mbíodh ina mhionlach tráth don saol ach atá ina mhionlach anois – is é sin an pobal a labhraíonn agus a shaothraíonn, mar a dhéanann muidne, i nGaeilge.

Ba mhaith liom sampla amháin a dhéanamh de sin. Labhróidh mé mar scríbhneoir anois. Tharla gur tháinig leabhar, úrscéal do dhaoine fásta, de mo chuid féin amach. Tá áthas orm a rá gur glacadh go han-mhaith leis agus bhain sé cúpla gradam amach. Bhíomar i dteagmháil leis an gclár ealaíne “Arena” ar RTÉ Raidió 1. Chuamar i dteagmháil leis an gclár cúpla uair go deas múinte. Dúirt muid go raibh ábhair i mBéarla ar fáil agus achoimre ar na caibidlí ar fáil. Luaigh mé mo thaithí féin mar chraoltóir a bhí ag obair le 13 bliana in RTÉ agus go raibh seans ann go mbeinn in ann agallamh maith a dhéanamh. Ach ní raibh aon suim ann. Tá sé níos deacra ag dul i bhfeidhm ar nuachtáin, mar shampla, mar gur gnóthaí iad, ach sin dream Stáit a bhfuil cúram acu mar chraoltóir seirbhíse poiblí. Ba cheart go mbeadh polasaí soiléir ag “Arena”, mar shampla, go mbeadh clúdach acu ar chruthaitheacht agus ealaín na Gaeilge agus ar leabhair na Gaeilge san áireamh. Ní hamháin gur cheart polasaí a bheith ann ach ba cheart an polasaí a chur i bhfeidhm.