Ms Deirdre N? Thuathail:

Tá easpa acmhainní daonna i gceist chomh maith le gach uile rud eile. Tá go leor de na foilsitheoirí atá ag obair le duine amháin nó beirt agus tá go leor de na daoine atá ag obair acu, amhail dearthóirí, profléitheoirí nó cibé céard é féin, ag obair ar conradh. Tá ualach trom ar fhormhór na bhfoilsitheoirí ó thaobh riaracháin. De réir mar atá an gnó ag méadú, tá sé sin ag méadú leis. Tá na foilsitheoirí ag déanamh a gcuid margaíochta féin faoi láthair ach caithfidh an dá rud oibriú as lámh a chéile. Caithfear an t-infreastruchtúr dáileacháin a bheith ann chomh maith leis an margaíocht agus leis an bpoiblíocht. Tá bunstruchtúr maoinithe ag teastáil ar chomhaontaíodh le gur féidir é sin a láidriú. Táimid muiníneach go dtiocfaidh an díolachán dá réir ach an infheistíocht cheart sin a dhéanamh. Má fheictear go bhfuil díolachán suas ar €1 milliún ag ÁIS cheana féin ar an gcaoi a bhfuil sé, dá ndéanaí infheistíocht cheart ansin, d'fhéadfaí é sin a mhéadú go mór. Bheadh níos mó airgead againn ar fad ón díolachán ina dhiaidh sin agus is infheistíocht mhaith a bheadh ansin.