Dara Calleary (Mayo, Fianna Fail) | Oireachtas source

Gabhaim buíochas le hÁine-Máire Ní Cheallaigh agus Bernie Kelly agus na foirne atá leo as na cuir i láthair. Tá sé soiléir go bhfuil ábhar bróid san obair a dhéanann siad do na leabharlanna. Tá cúpla ceist agam, cosúil leis an Teachta Connolly, faoi chúrsaí soláthair. B'fhéidir go gcaithfidh muid oifig an tsoláthróra a thabhairt isteach chun na ceisteanna seo a fhreagairt. Tá mé ag iarraidh na ceisteanna seo a chur ar Bernie Kelly go háirithe mar tá sí i leabharlann áitiúil taobh amuigh de Bhaile Átha Cliath. An bhfuil deis ag Comhairle Chontae na Gaillimhe leabhair atá foilsithe go háitiúil a cheannach? D'fhéadfadh na leabhair sin a bheith faoin stair áitiúil as Gaeilge nó d'fhéadfaí scéalta áitiúla as Gaeilge as bailte Chontae na Gaillimhe, as paróistí nó as na hoileáin, a bheith ann. An bhfuil aon deis chun ceannach cosúil leis sin a dhéanamh i gcomhthéacs an tsoláthair seo?