Ms Elly Shaw:

Le cur leis sin, agus leis an bpointe a rinneadh níos luaithe faoin bpoiblíocht, má tá leabhair agus irisí iontacha againn ach nach féidir linn iad a chur chun cinn, tá sé deacair léitheoirí a mhealladh. Ó mo thaithí féin, toisc nach bhfuil ach beirt ag obair go lánaimseartha le Comhar, LeabhairCOMHAR agus na tograí eile ar fad atá againn, is í an phoiblíocht ceann de na rudaí ag deireadh an liosta. Bíonn muid chomh dírithe ar an mbunrud, sé sin, an leabhar nó an iris a chur amach agus déanamh cinnte de go bhfuil an iris ag na clódóirí, sna siopaí agus ag na síntiúsóirí. Muna bhfuil mórán daoine ann chun an obair sin a dhéanamh, fágtar an píosa margaíochta agus poiblíochta, atá an-taitneamhach agus an-tábhachtach, chun deireadh.

Dá mbeadh an maoiniú mar a bhíodh againn, bheadh muid in ann leanúint ar aghaidh. Tá an-obair á dhéanamh againn ar na meáin shóisialta agus is féidir le duine amháin an-chuid a dhéanamh i spás ama an-ghearr ach fós féin tá tuilleadh ag teastáil.