Aengus Ó Snodaigh (Dublin South Central, Sinn Fein) | Oireachtas source

Coimeádfaidh mé réidh chuige sin, a Sheanadóir. Gabhaim buíochas leis na finnéithe ar fad as an gcur i láthair a rinne siad agus na freagraí a thug siad dúinn ar na ceisteanna ar fad. Beidh tuarascáil ón gcomhchoiste bunaithe air seo agus ar na cruinnithe eile a bhí againn maidir le tithíocht, agus tá súil againn go mbeidh sí sin foilsithe sar i bhfad. Tá Seán Ó Catháin, atá taobh thiar díobh, ag clóbhuaileadh ar aghaidh ansin agus b’fhéidir go mbeimid in ann é a chur ar aghaidh sula bhfoilseoidh an tAire na treoirlínte tithíochta a luaigh sé an bhliain seo caite mar go bhfuilimid chun tosaigh air go fóill.

Measaim go mbeidh sé réidh i mí Aibreáin. Tá súil againn go mbeidh sé sin déanta, go mbeidh éifeacht éigin ag an méid a bhí le rá ag daoine agus go n-éistfidh an tAire agus an Rialtas leis an méid atá á rá againn. Cuireann sé sin críoch leis an gcuid seo den chruinniú. Gabhaim buíochas leis na finnéithe ar fad a labhair linn: Joe Ó Dochartaigh, Niall Ó Catháin agus Pádraig Ó Mianáin ó Choiste Forbartha Charn Tóchair; agus an Dr. Feargal Mac Ionnrachtaigh, Gearóidín Nic Chathmaoil agus an Dr. Orla Nic Oirc ó Ghlór na Móna.

Tá deireadh leis an gcuid sin den chruinniú. Caithfidh mé dhá rud gasta eile a dhéanamh. Tá dréacht-tuairisc bhliantúil an chomhchoiste do 2021 agus dréacht-tuairisc an chomhchoiste ar an toscaireacht chuig ard-fheis Chonradh na Gaeilge curtha ar aghaidh chuig na comhaltaí. Déanfaimid breathnú orthu sin ag an gcéad chruinniú eile. Glacaim leis nach bhfuil aon ghnó eile ag aon duine anseo.

Beidh cruinniú príobháideach againn an Mháirt seo chugainn chun déileáil leis na tuarascálacha. Ansin, beidh dhá chruinniú againn ar an gCéadaoin seo chugainn, an 30 Márta. Beidh an tAire Dlí agus Cirt, Teachta McEntee, linn chun plé a dhéanamh ar an bhfáth a rinneadh fáil réidh leis an riachtanas bunriachtanach d’iarrthóirí an grád 50% a bhaint amach sa scrúdú inniúlachta béil sa Ghaeilge lena bheith incháilithe le hardú céime a fháil chuig céimeanna sáirsint nó cigire, ar chinneadh an Rialtais nach mbeidh Gaeilge riachtanach níos mó ag baill den Gharda Síochána agus ar pholasaí an Roinn Dlí agus Cirt i leith chur chun cinn na Gaeilge sa Roinn féin agus sna comhlachtaí reachtúla, comhlachtaí neamhreachtúla agus comhlachtaí achomhairc a thagann faoina cúram agus a thugann sí maoiniú dóibh.

Ansin, ar 4 p.m., beidh Robert Watt, Ard-Rúnaí an Roinn Sláinte, agus Paul Reid, príomhfheidhmeannach Fheidhmeannacht na Seirbhíse Sláinte, linn chun plé a dhéanamh ar fhíseán de chuid Fheidhmeannacht na Seirbhíse Sláinte chun mná torracha a spreagadh chun an vacsaín in aghaidh an choróinvíris a fháil, físeáin nach raibh ar fáil i nGaeilge in ainneoin go raibh sé ar fáil in a lán teangacha eile agus ar na teangacha éagsúla ina soláthraíonn agus ina bhfógraíonn Feidhmeannacht na Seirbhíse Sláinte a gcuid seirbhísí don phobal. Thug an bheirt sin geallúint go dtiocfaidís os ár gcomhair cúpla mí ó shin agus beidh siad linn an tseachtain seo chugainn. Tá súil agam go bhfeicfidh mé na comhaltaí ar fad ansin.