Mr. Julian de Spáinn:

D’fhéadfainn cúpla focal a rá ar an gceist sin. Aontaím leis an Teachta. Tá an fhianaise ann nuair a fheictear an líon daltaí a dhéanann teanga eile seachas an Ghaeilge, cé go bhfuil díolúine faighte acu ó thaobh fhoghlaim na Gaeilge. Ní dóigh liom ach go raibh an córas a chuir an Roinn Oideachais ar bun chun athbhreithniú a dhéanamh ar chóras na ndíolúintí thar a bheith claonta i dtreo toradh faoi leith a bhí ag teastáil uaithi ón tús. Pé scéal é, tá an córas nua i bhfeidhm faoi láthair. Tá gá le hathbhreithniú air agus gealladh go mbeadh athbhreithniú air tar éis dhá bhliain. Tá gá le tús a chur leis sin anois. Is é an rud is bunúsaí ar a bhíomar ag caint níos luaithe maidir le húsáid, mar shampla, an Fhráma Tagartha Comónta Eorpach, ná dá gcuirfí é sin i bhfeidhm sna scoileanna agus go gcabhródh sé go mór leis an gceist seo. Bheadh sé in ann freastal ar dhaltaí a thagann isteach go déanach sa chóras nó ar na daltaí le deacrachta foghlama. Is é an sampla is éasca a thabhairt faoi sin ná go bhféadfaí an ardteistiméireacht a dhéanamh sa scrúdú béil amháin má ta deacracht mhór scríofa ag an dalta.

Ina ionad sin, tá an córas faoi láthair ag seachaint na faidhbe agus ag cruthú córas díolúintí nach bhfuil i dtíortha eile, go bhfios dúinn. Nuair a labhraítear leis na saineolaithe in Éirinn, d’fhéadfadh siad a rá go mb’fhéidir go bhfuil cás ann le 2% nó 3% díobh. Thug siad córas 10% den pheircintíl sna cumais ar fad isteach. Bhí sé sin i bhfad ro-leathan agus ba chóir breathnú ar an scéal seo arís.