Joe McHugh (Donegal, Fine Gael) | Oireachtas source

Gabhaim buíochas as mo cheapachán úr mar Sheanadóir. Táim sásta leis sin. Níl brú ar bith orm anois agus gabhaim buíochas as sin freisin. Fearaim fáilte roimh achan duine go dtí an coiste inniu. Tá brón orm nach raibh mé ag an gcruinniú ón tús agus tá brón orm fosta má théimid trasna na rudaí céanna.

Tá cúpla ceist agam. Táim ag smaoineamh faoin duine gan Ghaeilge agus atá i gceist aige nó aici dul ar ais chun foghlaim nó athfhoghlaim na Gaeilge a dhéanamh. An bhfuil aon bhealach isteach fá choinne an duine sin, mar shampla, le ceachtanna a bheadh ina chuidiú nó cabhrú ar an teilifís, mar shampla, agus le clár chun cuidiú nó aire a thabhairt do na daoine atá ag smaoineamh dul ar ais go dtí an Ghaeilge? B’fhéidir go bhfuil RTÉ ag déanamh amhlaidh mar ní bhím ag féachaint ar an teilifís go rómhinic. Táim ag smaoineamh ar an gcuidiú a bhí i gceist trí Covid-19 ó RTÉ ar nós an clár faoi homeschooling. Gabhaim mo bhuíochas le hachan duine a ghlac páirt leis sin agus na daoine sa chúlra fosta. B’fhéidir, agus muid ag teacht amach as Covid, go mbeadh rud éigin ar an mbealach céanna i gceist do na daoine ar an Idirlíon, ní hamháin na daoine óga ach na daoine aosta fosta.

Is iad sin an cúpla ceist a bhí agam agus is é an chéad cheist arís atá agam arís ná an bhfuil aon smaointe nó tuairimí ag RTÉ faoi cheachtanna nó chuidiú leis na daoine atá ag iarraidh tacaíocht foghlama nó athfhoghlama na Gaeilge?