Jack Chambers (Dublin West, Fianna Fail) | Oireachtas source

Maidir leis na leasuithe eile, caithfimid a bheith cinnte de go bhfuil na spriocanna a shocraímid réadúil agus indéanta. Táimid i mbun cainte le hOifig an Ard-Aighne maidir leis na spriocanna seo fós. Ba mhaith liom a bheith cinnte de go bhfaighimid é seo i gceart. Maidir le spriocanna tar éis 2030, sílim go bhféadfaimis feidhm eile a thabhairt don choiste comhairleach chun spriocanna a mholadh don Aire don tréimhse tar éis 2030. Beidh deis ag an am sin spriocanna nua a leagan síos don tréimhse tar éis 2030, spriocanna níos uaillmhianaí don tréimhse go dtí 2050 nó 2040, mar shampla. Mar is eol don choiste, tiocfaidh deireadh leis an straitéis 20 bliain don Ghaeilge in 2030 chomh maith. Is deis iontach é seo chun straitéis nua don teanga a chur ar bun go comhthreomhar le spriocanna nua earcaíochta don tréimhse tar éis 2030. Is é mo thuairim phearsanta ná gur ceart go mbeidh spriocanna láidre uaillmhianacha leagtha síos don tréimhse go dtí 2050. Ag an am seo, is é an tréimhse go dtí 2030 an tréimhse is tábhachtaí. Táim ag iarraidh a bheith cinnte de go mbeidh an sprioc a leagtar síos soiléir, láidir agus indéanta. Sa chomhthéacs seo, ní bheidh mé ag brú mo chuid leasuithe féin, Uimh. 184 agus 185, níos déanaí. Ba mhaith liom teacht ar ais le moltaí eile ag Céim na Tuarascála a thabharfaidh aghaidh ar an méid atá ardaithe sna leasuithe seo agus a dhéanfaidh cinnte de go mbeidh 20% d'earcaithe nua inniúil sa Ghaeilge faoi 2030. Ar an mbonn sin, b'fhéidir go mbeadh na Teachtaí sásta na leasuithe seo a tharraingt siar.