Jack Chambers (Dublin West, Fianna Fail) | Oireachtas source

Go bunúsach, baineann na leasuithe uile leis an bhfocal “aicmiú” a chur in ionad “caighdeán”. Tar éis dom féachaint ar na leasuithe seo sa chomhthéacs seo, táim muiníneach go bhfuil an fhoclaíocht mar atá sé sásúil chun an bhrí atá i gceist a chur trasna. Sílim go bhféadfadh míthuiscint a bheith ann faoi céard atá beartaithe sa Bhille. Leagtar amach in alt 19A(1) agus (2) gur féidir aicmiú na gcomhlachtaí poiblí a dhéanamh. Go praiticiúil, is éard a bheadh i gceist anseo ná go mbeadh na caighdeáin teanga céanna leagtha síos d’aicme comhlachtaí poiblí, comhairlí contae nó institiúid tríú leibhéal, mar shampla. Is ar an mbonn sin a dhéanfar aicmiú. Baineann an focal caighdeán leis na caighdeáin féin. Dá bhrí sin ní bheidh mé ag glacadh leis na leasuithe seo.

Maidir le leasú Uimh. 114, baineann sé seo leis an bhfocal “rachaidh” a chur in ionad an fhocail “féadfaidh”. Is í an fhadhb a bhaineann le “rachaidh an tAire i gcomhairle” seachas “féadfaidh an tAire dul i gcomhairle” ná nach bhfuil aon teorainn leis an lion uaireanta go bhféadfadh an tAire a bheith ag breathnú ar iarratais ar mhaolú agus b’fhéidir nach mbeadh gá le comhairliúchán i gcónaí. Mar shampla, má thagann an cás aníos i gcomhlachtaí poiblí difriúla, d’fhéadfadh ansin nach mbeadh gá ag an Aire dul i gcomhairle le haon duine mar go mbeadh freagra na ceiste nó an t-eolas agus an fhianaise chuí aige cheana féin. Leis an bhfoclaíocht seo tá deis aige dul i gcomhairle, más gá. Mar sin, ní shílim go bhfuil an fhoclaíocht ceart mar atá sí.