Jack Chambers (Dublin West, Fianna Fail) | Oireachtas source

Aontaím leis an Teachta Ó Snodaigh gur chóir go mbeadh leordhóthain bhreithiúna inniúil sa Ghaeilge chun seirbhís dhátheangach d'ardchaighdeán a chur ar fáil don phobal ach ní aontaím gur chóir dúinn é seo a dhéanamh tríd an leasú atá molta ag an Teachta inniu. Tá cur amach ag daoine ar an bpróiseas atá ann chun breithiúna a cheapadh agus tá geallta sa chlár Rialtais go ndéanfar an Bille fá choimisiún um cheapacháin bhreithiúnacha a achtú agus tá obair ar siúl maidir leis an mBille sin.

Mar is eol don Teach, tugadh isteach Acht na nDlí-Chleachtóirí (An Ghaeilge), 2008 ar an 9 Iúil 2008. Foráiltear le halt 2 go dtabharfaidh Dlí-Chumann na hÉireann aird ar bheartas an Rialtais maidir le dátheangachas agus go ndéanfaidh sé gach beart réasúnta chun a chinntiú go mbeidh líon leordhóthanach aturnaetha in ann an dlí a chleachtadh trí Ghaeilge. Bunaíodh cláir na Gaeilge in Óstaí an Rí agus sa Dlí-Chumann faoin Acht seo chomh maith. Tá na cláir seo cothrom le dáta agus tá siad ar fáil go poiblí ar shuíomh Idirlín na n-eagraíochtaí seo.

Tá oifig mo Roinn tar éis radharc fadtéarmach a ghlacadh maidir leis an gceist seo. Tá cuid oibre ar bun i láthair na huaire chun tacaíochtaí a chur ar fáil do chleachtóirí a bhfuil suim acu seirbhísí trí Ghaeilge a chur ar fáil don phobal. Déantar maoiniú a chur ar fáil do chúrsaí Gaeilge in institiúidí tríú leibhéal in Éirinn faoin tionscnamh ardscileanna Gaeilge. Soláthraíonn an Roinn maoiniú do 12 cúrsa tríú leibhéal atá speisialithe i réimsí amhail aistriúchán, léirmhíniú agus dlí. Luíonn sé le réasún go mbeidh na cleachtóirí seo ar fáil le bheith ceaptha mar bhreithiúna amach anseo. Bunaithe air seo, ní bheidh mé ag glacadh leis an leasú seo.