Aengus Ó Snodaigh (Dublin South Central, Sinn Fein) | Oireachtas source

Déanfaimid é sin má aontaíonn an coiste leis. Tá cúpla rud aontaithe againn mar chodanna den phlean oibre. Tiocfaimid ar ais chuige sin. Scríobhfaimid chuig na comhairlí áitiúla sna ceantair ina bhfuil Gaeltachtaí ann, mar a leagadh amach. Ansin, beidh muid ag smaoineamh ar an Aire a thabhairt os ár gcomhair.

Maidir le mír comhfhreagrais F038, molaim go dtabharfaí dár n-aire go bhfuarthas an comhfhreagras agus go n-aontaíonn muid le é a thaifead sna miontuairiscí go dtí go dtiocfaimid ar ais air. Táim ag caint faoin méid a chuir an Conradh ar aghaidh chugainn. An aontaítear leis sin? Aontaítear.

Táimid ag bogadh ar aghaidh go dtí mír comhfhreagrais F039 ón Aire Stáit le freagracht as an nGaeltacht agus spórt, an Teachta Chambers, Príomh-Aoire an Rialtais. Tá sé ag iarraidh Bille na dTeangacha Oifigiúla (Leasú), 2019 a chur os comhair an choiste ar an gCéadaoin, an 25 Samhain, le tús a chur le Céim an Choiste. Ba mhaith leis go gcríochnófaí an Chéim sin chomh luath agus is féidir. Sula labhraím faoi sin, tá dréachtphlean oibre againn. Cuirfidh aon chinneadh maidir leis an reachtaíocht sin isteach ar an bplean mar atá.

Maidir leis an gcomhfhreagras féin, fuair mé é i ríomhphost Dé Luain. Ní bhfuair mé cóip chrua de go fóill ach táimid ag déileáil leis sin. Scríobh an cléireach ar ais ag an Aire Stáit agus ag an gCeann Comhairle. Bhí mé i dteagmháil le hOifig na mBillí freisin ach fós, go hoifigiúil, ní bhfuair muid nóta ag rá go bhfuil an Bille le teacht os ár gcomhair. Mar sin, ní féidir leis an gcoiste cinneadh a dhéanamh maidir leis an dáta. De réir an chórais, caithfear an treoir a tugadh don Roghchoiste um na Meáin, Turasóireacht, Ealaíona, Cultúr, Spórt agus Gaeltacht a tharraingt siar agus treoir nua a thabhairt don choiste seo. Is é sin an méid a dúradh liom. Go dtí go dtarlaíonn sé sin, ní féidir linn dul ar aghaidh. Araon le gach ball eile, táimse ar bís chun tosú.

Chuir mé ceist ar Oifig na mBillí freisin ó thaobh an réamhfhógra gur gá dom tabhairt do Theachtaí maidir le leasuithe. Dá mbeadh an cruinniú ar an 25 Samhain, ba é an 20 Samhain an dáta deiridh chun leasuithe a mholadh. Dá mbogfaí an cruinniú go dtí an 2 Nollaig - agus chaithfí é a bhogadh anois - ba é an 27 Samhain an dáta deiridh. Ní féidir linn cinneadh a dhéanamh maidir leis ach is féidir le daoine impí ar an Aire Stáit, atá mar Phríomh-Aoire, an rún a chur. Níl éinne chun cur ina choinne. Ansin, is féidir linn déileáil leis.