Dr. Harold Hislop:

B'fhéidir go dtógfaimid ar dtús an cheist a bhí ag an Teachta Ó Cuív mar gheall ar na múinteoirí. Tá coiste bunaithe ag an Roinn atá dírithe ar sholáthar múinteoirí. Tá ceist líon na múinteoirí ar fad á plé ag an gcoiste sin agus tá obair ar bun aige feabhas a chur ar sholáthar múinteoirí. Níl muidne ag déileáil ach le píosa beag den obair sin leis an M.Oid agus an B.Oid. Ní mór cuimhneamh ar na háiteanna sa bhreis atá bunaithe in Ollscoil na hÉireann, Gaillimh chomh maith. Tá dian taighde á dhéanamh ag an Roinn faoi láthair ar cheist soláthair múinteoirí go ginearálta. Níl na sonraí ar fad agam um thráthnóna mar gheall ar líon na múinteoirí.

Tagraím don e-hub. An rud is fearr b'fhéidir ná eolas sa bhreis scríofa a thabhairt do na baill mar tá cur síos déanta againn ar an scéim a bhí againn i mbliana agus na ceachtanna a d'éirigh as sin. Rinneamar taighde i dtíortha eile ar dtús conas a leithéid a chur ar fáil. Tá scéim cosúil leis seo in Albain, san Astráil agus i gCeanada. D'fhoghlaimíomar roinnt mhaith ceachtanna ó na daoine sin. Bhíomar ag plé leo ar an Idirlíon agus araile. Rinneamar iarracht i mbliana ceachtanna a chur ar siúl don idirbhliain. D'éirigh go maith linn. Bhí fadhbanna ann agus d'fhoghlaimíomar roinnt mhaith ceachtanna, ach tá na múinteoirí dírithe ar na mic léinn amháin. Níl rang eile acu, tá siad ar fad ar an idirbhliain ach tá bileog agus nóta eolais agam air gur féidir liom seoladh chuig an Teachta nó chuig rúnaí an choiste agus tabharfaidh sin na sonraí ar fad don Teachta.