Mr. Gavan O'Leary:

Tá comharthaí dátheangacha againn sa cheaintín sa Roinn agus rudaí mar sin ach is dúshlán é. Níl freagra simplí againn, ná agam, ar chonas daoine a mhealladh chun a gcuid Gaolainne a úsaid. Maidir leis an gciorcal comhrá, sin ceann de na samplaí atá agam. Tá daoine á mealladh isteach a bhfuil Gaeilge de shaghas nó beagáinín Gaeilge acu ach a bhfuil sásta í a úsáid. Ach tá an ceart ag an Teachta: go minic deireann daoine nach bhfuil siad líofa go leor dul isteach agus labhairt le daoine atá líofa. Is é an fhadhb nó an dúshlán atá againn ná iad a spreagadh triail a bhaint as agus a gcuid Gaolainne a úsáid. Fiú muna bhfuil siad in ann an comhrá iomlán a bheith acu as Gaeilge, caithfimid iad a spreagadh iarracht a dhéanamh agus dul i dteagmháil le comhghleacaithe eile atá sásta Gaeilge a úsáid agus a bheidh sásta cabhrú leo agus tacaíocht a thabhairt dóibh. Níl freagra simplí agam don Teachta, ach tá iarrachtaí á ndéanamh agus táimid oscailte do bhearta a oibríonn i Ranna eile. Iarrfaidh mé ar Dr. Kirk cúpla focal a rá.