Mr. Gearóid Mac Donncha:

Is fiú a luadh ar an bpointe sin an pháirtnéireacht a bhí idir Raidió na Gaeltachta agus 2FM píosa ó shin maidir le suíomh Idirlín, www.nos.ie. Mar chuid de ghradaim ceoil a bhí ag 2FM, shocraíomar ar aird a tharraingt ar ghrúpaí nua a bhí ag cumadh ceoil trí Ghaeilge agus a bhí ag dul ar stáitse do phobal na Gaeilge timpeall na tíre. Chuaigh muid i bpáirt le 2FM agus chraol muid an oíche gur bronnadh na ngradam beo ar Raidió na Gaeltachta. Bhí 2FM ag craoladh cuid den cheol a tháinig as an gcomórtas sin. Deis a bhí ann dúinn na hamhráin Ghaeilge atá á chumadh inniu ag daoine óga a bhfuil Gaeilge acu a chur amach ar an aer agus a bhrú isteach i dtreo 2FM le níos mó aird a tharraingt orthu. Is bealach amháin eile é sin ina bhfuilimid ag cur seirbhís ar fáil do dhaoine óga.