Dr. Áine Nic Niallais:

Go minic ní bhíonn an diagnóis faighte ag an aois seo. B'fhéidir go bhfaighfí é sa naíonra ach níor tháinig sé chun cinn mórán go dtí seo - ó na fostaithe ar aon nós - go raibh fadhb mar sin ann. Tháinig cúpla cás chun cinn nuair a bhí na páistí an-óg ach ní raibh na fostaithe in ann aon rud a dhéanamh faoi mar ní raibh diagnóis ann. Mar sin, ní fhéadtaí aon idirghealú a dhéanamh eatarthu sin agus gnáthpháistí eile. Tá an scéal sin tábhachtach ar bhealach ach, ar bhealach eile, níl a fhios agam go mbaineann sé leis seo. An phríomhtheactaireacht ó na fostaithe ná go raibh siad faoi bhrú mar go bhfuil níos mó le déanamh acu ná mar atá ag gnáthfhostaithe in ionad cúram leanaí. Ní hamháin go bhfuil na fadhbanna sin uilig a tharlaíonn i dtaca le páistí a bhfuil riachtanais speisialta acu ann ach tá an Ghaeilge, an Béarla agus b'fhéidir teangacha eile i gceist chomh maith. Cinnte tá sé sin i gceist agus baineann sé leis an mbrú atá ar na fostaithe seo.