Catherine Connolly (Galway West, Independent) | Oireachtas source

Sea. Tá siad ag tabhairt tacaíochta sa scoil ach, ag an am céanna, tá ról faoi leith acu maidir leis an teanga. Tá sé sin thar a bheith deacair agus tuigim an cás ach táim ag iarraidh ar na finnéithe é a mhíniú agus a dhéanamh beagán níos soiléire dúinn a fhad is atá na Teachtaí ag smaoineamh faoina gceisteanna. Is é seo deis do na finnéithe a chur in iúl dúinne na dúshláin maidir le hionaid mar seo a fheidhmiú. Cad iad na dúshláin eile atá ann? Mar shampla, ó mo thaithí féin, mar bhí mé i mo shíceolaí na blianta ó shin, an bhfuil polasaí ann maidir le daoine faoi mhíchumas? Ardaíodh an téama céanna i dTír Chonaill inné. Cén polasaí atá ag Crann Taca maidir le gasúir faoi mhíchumas nó gasúir le fadhbanna teanga? An bhfuil dúshlán faoi leith ann iad a chlúdú agus a thabhairt isteach? Chualamar inné i dTír Chonaill maidir le daoine le fadhbanna ar leith. An chomhairle i gcónaí a bhíonn ann ná gan bacadh leis an nGaeilge toisc go bhfuil sé ró-dhúshlánach. Bhí sé sin ar chuile leibhéal. Dúradh an bhéim a chur ar an mBéarla mar tá sé i bhfad níos éasca agus nach mbeadh na gasúir trína chéile. Glacadh d'aon ghuth inné gur chomhairle mícheart é sin.