Mr. Lochlainn Ó Tuairisg:

Is tuismitheoirí muid triúr as cúlraí éagsúla Gaeltachta agus Galltachta, a raibh, a bhfuil agus a mbeidh gasúir linn ag baint úsáid as cuid de na seirbhísí cúraim leanaí atá ar fáil sa gCrann Taca i gCois Fharraige. Ní hionann chuile ionad cúraim leanaí agus ní hionann chuile cheantar Gaeltachta ó thaobh réimse agus caighdeán seirbhísí de ná ó thaobh chomh folláin is atá an Ghaeilge mar teanga phobail iontu. Ó tháinig muid ar an mbord stiúrtha tuairim agus bliain go leith ó shin, tá sé tugtha faoi deara againn go bhfuil géarghá le cur chuige comhtháite straitéiseach san earnáil cúraim leanaí sa nGaeltacht.

Is coiste deonach muide agus, mar atá léirithe againn sa ráiteas atá os comhair an choiste, ní raibh muid i bhfad ag an mbord stiúrtha nuair a thug muid faoi deara gur fúinn féin a bheadh sé cinneadh polasaithe a chur i bhfeidhm a chinnteodh fís lucht bunaithe an Chrann Taca - gur ionad tacaíochta teaghlaigh a bheadh ann dóibh siúd atá ag tógáil a gclanna le Gaeilge. Is í an cheist a rith linn ansin ná cén ról atá ag an Stát anseo. Chonacthas dúinn go raibh go leor ama agus fuinneamh ídithe agus caite ag an bpolasaí oideachais Gaeltacha agus ag an bpleanáil teanga, ach cá raibh an bhéim ar an gcéad chéim sa bpróiseas seo, sé sin, an réamhscolaíocht, an aois chriticiúil sin idir sé mhí agus cúig bhliana, tráth a leagtar síos bunchloch do shealbhú na teanga agus do shóisialú sa teanga sin? Is í sin an chúis a bhfuilimid tagtha os comhair an choiste inniu. Dírím aird na gcomhaltaí ar an mbileog sin.