Catherine Connolly (Galway West, Independent) | Oireachtas source

Ag an bpointe seo, ba mhaith liomsa teacht isteach. Ní mór dom a rá go dtéann comhionnanas inscne na bhfinnéithe go mór i bhfeidhm orm. Tá ceathrar fear anseo ón ollscoil. Idir súgradh agus dáiríre, tá ceathrar fear agus níl bean le feiceáil. B'fhéidir go bhfuil sé sin do lá eile.

Ní mór dom a rá gur tháinig cinneadh an údaráis aniar aduaidh orm. Tá cúpla ceist agam. Tá sé ráite go raibh ceithre chruinniú i gceist idir mí na Samhna agus mí Feabhra. Baineann an cur i láthair seo go mórmhór leis an gcinneadh fáil réidh leis an riachtanas Gaeilge don chéad uachtarán eile. Cén fáth go raibh ceithre chruinniú ann idir mí na Samhna agus mí Feabhra?