Dinny McGinley (Donegal South West, Fine Gael)

Ní shílim go bhfuil traidisiún nó nós ann, nó go bhfuil sé fiú amháin dleathach, go ndéantar miontuairiscí de Choistí Rialtais a fhoilsiú. Ní shílim go dtarlaíonn sé sin.

Bhí dhá chruinniú an-thábhachtacha ag an choiste Rialtais nuair a tháinig an Rialtas isteach in Oifig. Bhí siad an-thábhachtach mar gur leagadh síos ag an chomhchoiste sin an obair a bhéadh ar siúl ag an Roinn maidir leis an Ghaeilge agus le cur chun cinn na straitéise ins na míosa amach romhainn. Tá dul chun cinn mór déanta ó tugadh treoir dúinn.

Dálta an scéil, b'fhéidir nach raibh ach dhá chruinniú foirmeálta ann ach is féidir liom a rá go raibh cruinniú an-thábhachtach agam féin tá cupla seachtain ó shin leis an Aire, an Teachta Deenihan, le hArd Rúnaí na Ranna agus leis an Taoiseach féin in oifig an Taoisigh, nuair a tugadh cuntas dó ar an dul chun atá déanta ó tugadh treoracha dúinn. Is é an toradh atá ar sin ná go bhfuil an Rialtas anois tar éis glacadh le Bille Gaeltachta, go bhfuil sé ag an Dréachtóir Parlaiminte i láthair na huaire agus go mbeidh sé ag teacht isteach anseo san am nach bhfuil i bhfad romhainn. Rud stairiúil ar fad é sin. An uair dheireannach a bhí Bille Gaeltachta ins an Teach seo, b'fhéidir nach raibh an Teachta Tóibín ar an tsaol. Ní raibh mé féin ró-shean ach an oiread. An bhliain 1956 a bhí ann. Don chéad uair ó 1956, tá Bille Gaeltachta ag teacht isteach atá chun aghaidh a thabhairt ar na deacrachtaí atá an Teachta Tóibín tar éis a luadh agus, dálta an scéil, an bhfuil aitheantas tugtha ag an suirbhé teangeolaíochta dóibh agus a thuigim féin, mar dhuine as an nGaeltacht. Sin an fáth go bhfuilimíd ag tabhairt tosaíochta don reachtaíocht seo thar aon reachtaíocht eile, beagnach. Táthar ag obair air i láthair na huaire.

Maidir leis an chéad chruinniú eile den Choiste Rialtais, beidh sé ann gan mhoill. Tá na hard oifigigh ag déanamh a gcuid oibre, mar adúirt mé ins an fhreagra. Tá na hard oifigigh ag teacht le chéile ar dtúis agus ansin beidh an coiste féin ag teacht le chéile arís. Tá an obair ag dul ar aghaidh, lá i ndiaidh lae.

See this speech in context